maart, 2012

Wim Toorneman

Het is noe al wier 2012 en het mut d’r toch mar een keer van kommen. Trouwens nog niks e heurd van Toonhermans, den moch d’r best wel wat meer achter an zitten. De leste tied heb ij de penne ok nit völle in de haande had, Het bleef bij varfrollers, kweste en schoerapparaat.

Mien naam is Jan Willem Hendrik Toorneman, wij neumt ‘m op ‘t wark Meneer en thuus gewoon Wim en bij de kammereu natuurlijk Menneke. Det hef mien va nog bedach en doar bun ik greuts op. Oaver het gezin van Dine en Jehan steet in de vurige stukskes informatie. Det weet jullie allemaal wal, oaver de kammereu mut ie nog mar ‘s bij Gait en Wim van de Mijersmans kieken, steet ok nog een alderbastend mooie foto bij! Um nog effen terugge te kommen op oom Chris, den hef nog wat vergetten. As kleine jonge was al behoorlijk bij de haand. Toen d’r in oorlogstijd kot bij oons een bom was e valn, vreug de buurman woar de bom precies terechte was e kommen. OP DE GROOND, GETJANOOM! Det antwoord schöt bij Getjanoom natuurlijk iets in het verkeerde halsgat. Zo’n kleine wiesneuze, helemaal gin eerbied veur oaldere leu. Wat ik ok nog weet van oom Chris en tante Dine is er brulfte. Lekkere bool uut ‘n groten emmer op ‘t schap. Noaderhaand hef ‘t kleine breurke van mien moo altied bij de baanke e’warkt. Det was helaas veur um in de tied veurdat het grote graaien begon. In december 62 , tweeden kasdach?? Met de busse noar oom Chris in Twello. Ik weet nog good det wij achter op de fietse zaten op de terugweg van Diekerhook noar Sploo. Koold, snee, völle weend, kortom hartstikke mooi weer. Ie hebt 2 soorten leu, leefhebbers van ies en snee en aandern. Ie meugt mie volop tut de eerste koppel rekkenen. Niks mooier as snee en völle weend en ies. Schaatsen jagen as ie mut maken dej veuruut komt umdet ie d’r aanders duur goat. Mien va zei in 62 ie bunt een mooie keal, zit mooi achter ’t glas te kieken en ik mut d’t duurhen ploetern met de melkwagen. Det was met die bulten snee in 63 zeker nit gemakkelijk. Die tik van het weer en dan zeker de extremen is allenig mar slimmer e worden. Meteorologie studeern was veur mien te moeilijk, dan mos ie al die exacte vakken in ’t pakket, ik heul het mar bij het pretpakket. De weenter van 79 was ok zo’n hoogtepunt. In de kasvekaansie een paar dagen met Ina , Anton en Jantien en Mies noar het Sauerland. Snee was d’r nit te bekennen, het was botterzachte. Det wordn wel aanders op d’n lesten dag, nog nooit wier met e maakt det de temperatuur in een paar uur tied zo.n 15 groaden oonderuut gung. Spekgladde weagen en nog een hele toer um veur Niejoar thuus te weazen.

Behalve het weer is ok de natuur en het landschap mien hobby. Van jongs af an kiefteneier zeuken, doar bleef een mooien zoepstuuver van oaver. Mien reserve va, Oompie , hef mien det e leert. Moch ok altied bij um veur op de stange met, fezaanten voer en zuk wark. Noe allenig nog zeuken um te bescharmen, het geet nit good met de weidevogels. Een nij vuurjoar zonder grutto , wulp en kieften in de loch hop ik nit met te maken. Doarneust al 20 joar zagen in de ruilverkavelingsbuskes, met succes. Wij hebt een enthousiaste vrijwilligersgroep die nog harder warkt dan ze bij de baas ooit hebt e doane. Met as beloning een bettere biotoop en wat hapjes en drankjes. Um an alle misverstand een eind te maken, veural kola lait, limonade en koffie. D’r bunt d’r mar twee die het gemiddelde bierverbruik mut opkrikken tut een normaal gemiddelde. Det doot wij d’r dan ok nog mar wier bij. Det holtvirus zat d’r trouwens ok altied al in. Poasvuursleppen is altied al mien hobbie wes. In de beginjoarn zonder trekker, wij trokken de wagen zelf. As ik noe al die oongelukkige blubberbende zee, dan hew in 87 toch wal geluk e had. Mooie kale dreuge vorst. Ik hoppe trouwens nit det ik 8 april wier de hele poasoavend met de slange op het dak mutte zitten. Gin tied um d’r nog een paar zwart te maken.

Wieters weet de meesten wal det ik al bienoa 38 joar veur de klas zit, allenig as ik de weend loat goan loop ik gauw noar achtern en dan met hoast weerumme. Aardrijkskunde is een mooi vak, het wordt helaas steeds meender e keuzen. Veur een paar joar nog 3 vier havo klassen, noe nog mar ééntje. Ok de dinge d’r umme hen , excursies noar het Lutterzand, landschapsexcursie Oaveriesel, het rivierngebied en natuurlijk de jaarlijkse warkwekke in de Ardennen vind ik nog altied mooi um te doon. De weelde heure bunt d’r bij mie veurige wekke of e goane, Arjan maken al een stetje bij het Piratenfeest, mut natuurlijk nit gekker worden. D’r is met oonzen roondgaank met de keals ok nit zovölle aparts gebuurd. Det könt de dames op 2 januari wal aanders! Het is natuurkijk heel mooi det wij disse tradities in ere hoolt. Ok al begriept de stadsen d’r nit zo völ van. Het valt mien op det het verschil tussen de grote stad (Almelo) en het landleven (Sploo) zeker nog aardig groot is. Vrogger gungen d’r nog jonge leu uut de stad (van schole) noar Normaal . Noe bienoa nit meer. Toch kan ik het normaliseern van die stadse bössels nog nit loaten. Het is mooi as Yusuf en Ali d’r achter kompt det het helemaal nit arg is um plattelander te weazen en det d’r een mooi veske oaver Alie maakt is. Vrogger best wel schik e had bij de Koeistal in Eibargen. Rok en rool in het dialect, bienoa net zo mooi as de Stoons en Stetus Kwo. 26 mei in Roalte!

De zomervakanties gungen vrogger altied noar Fraankriek, doar was de toer en doar was Alp dHuez, de goeie tied met Zoetemelk, Kuiper en Winnen met e maakt. Den eersten april is de Ronde (van Vlaandern) könt wij al wier nit hen, d’r is dan reunie van het paasvuur. Ok mooi, zol de buurman zeggen. De Todabokr schöt d’r de leste tied ok wat bij in, mut ongeldig weer wat vast e leggen. Gelukkig hef Bo noe wat meer tied, tied die ik ok mos hebben um beveurbeeld noar de 55 plus te goan. Lik mie helemaal te gek, mooi op een donderdagmiddag in het trefpunt zitten ouwehoern. Mar ja, ie mut rechtervoort (GJ ten Dam zeg det altied) steeds langer warken. Blif hoaste gin tied oaver um met de beide kleinkinderen te spöllen. Nooit e dach det het zo mooi kan weazen um Opa te worden. En ok Oma Ina hef d’r völle schik van, elken woensdag past zie op de beide kleinkeender Nienke en Luuk, bunt noe al weer ruum een joar ! Het is ondertussen bienoa 12 uur, Ina is al noar berre, mut man wier warken en ik stoppe d.r zo gangs met. De leazers zoln d’r aans ok bij in sloap valn. Ik geef de penne geerne duur an de buurvrouw van Okkenbrookseweg 8, Riance van Roy van Anton van Hutten. Zie hef mie zeg det ze met hoast de volgende ofleavering van in de penne zol schrieven , .

Groeten Wim Toorneman.

"In de Pen" is een rubriek waarin iemand (Sploder of aanverwant) een stukje schrijft over bijvoorbeeld zichzelf, hobby's, werk, een gebeurtenis, zijn omgeving etc. De keuze is aan de schrijver. Aan het eind geeft hij of zij de Pen door aan een ander. Deze rubriek heeft de intentie om elk kwartaal te verschijnen.